Бас прокуратура қазақстандықтарға әлеуметтік желілердегі ҚДТ аккаунттарын жоюға кеңес берді
АСТАНА. ҚазАқпарат - ҚР Бас прокуратурасы қазақстандықтарға әлеуметтік желілердегі «Қазақстанның демократиялық таңдауы» ұйымына қатысты аккаунттарды жоюға кеңес берді, деп хабарлайды «ҚазАқпарат» ХАА тілшісі.
«Парақшаларды тарату, посттар, пікірлерді дайындау, шығару мен көбейту жауапкершілігі бойынша - 2 АЕК айыппұл салудан 2 жылға дейін бас бостандығынан айыру жазасы қарастырылған. ҚР Қылмыстық кодексінің 405-бабы бойынша, бұған дейін айтып өткенімдей, қолдауға бағытталған пікір (комментарий) экстремистік ұйымды қолдау жолындағы белсенді әрекет болып саналады. Осы қозғалысқа тіркелген жазылушыларға аккаунттарды жоюға кеңес берер едім», - деді Астанада өткен жиында ҚР Бас прокуратурасының қылмыстық қудалау қызметінің бастығы Ерлан Абаев.
Еске сала кетсек, бүгін бүгін Бас прокуратураның өкілдері ОКҚ-да Мұхтар Әбілязовқа қатысты мәлімдеме жасаған болатын. Мәлімдемеде Бас прокуратура өкілдері Мұхтар Әбілязовтың басшылығындағы «Қазақстанның демократиялық таңдауын» экстремистік ұйым деп таныды.
Сонымен қатар, Бас прокуратура ҚДТ-ны әлеуметтік желіде қолпаштаған кез келген пікір экстремистік ұйымды қолдау болып саналатынын атады.
