Бәс тігуді насихаттайтын жарнамаға тыйым салу керек – министр
Туризм және спорт министрі Ермек Маржықпаев орталық коммуникациялар қызметінде ұлттық заңнамаға өткен брифингіде бәс тігуді насихаттайтын жарнамаға тыйым салу ұсынылып отырғанын еске салды, деп хабарлайды Kazinform.
Министрлік ойын бизнесінің жосықсыз субъектілерімен белсенді күресіп келеді. Мәселен, 2023 жылы сотқа 14 талап-арыз жіберіліп, 7 букмекерлік кеңсе, 5 тотализатор және 1 ойын автоматының залы жұмысын тоқтатқан.
«Депутаттармен бірлесіп, азаматтарды құмар ойындардан шектеу үшін бірқатар заңнамалық түзетулер әзірленді. Жас шектеуін 25 жасқа дейін көтеру, букмекер кеңселері, бәс тігу туралы кез келген жарнамаға барлық жерде тыйым салу қарастырылып жатыр. «Жауапты ойын» халықаралық қағидатын енгізу жоспарланып отыр, яғни егер адам борышкерлердің, алимент төлемейтіндердің және кредиттер бойынша мерзімі өткен берешегі бар бірыңғай тізімге енгізілсе, оған құмар ойындарын ойнауға тыйым салынады. Осы шаралардың барлығы елдегі лудоманияның дамуына жол бермеу жөніндегі құқықтық тәртіпті заңды реттеуге және қамтамасыз етуге бағытталған. Қазір елде 13 букмекерлік кеңсе, 8 ойын автоматының залы, 5 казино, 2 тотализатор, 1 лотерея операторы және 7 мыңнан астам агент жұмыс істейді», — деді Ермек Маржықпаев.
