Басы сүйегі мыжылған: Көкшетауда жұмысшының жарақат алуына байланыс іс қозғалды

КӨКШЕТАУ. KAZINFORM - Көкшетауда жұмысшының өндірістік жарақат алуына байланысты іс қозғалып, сотқа дейінгі тергеу амалдары жүргізіліп жатыр. 

Ақмола облысы ПД баспасөз қызметінің мәліметінше, 30 қаңтарда сағат 19:30 шамасында Ақмола облыстық ауруханасына Көкшетаудың іргесіндегі Краснояр ауылының тұрғыны «ашық бас сүйек-ми жарақаты, маңдай сүйегінің езіліп сынуы, мидың соққы алуы» диагнозымен жеткізілген. 

Анықталғандай, ер адам жергілікті кәсіпорындардың бірінде слесарь-жөндеуші болып жұмыс істеген. Қолмен айналдырып тартатын құрылғымен жүк көтеру кезінде жарақат алған.

«Қазіргі кезде, осы дерекке байланысты Қылмыстық кодекстің 156-бабының 2-бөлігі бойынша «еңбекті қорғау ережелерін бұзу» сотқа дейінгі тергеу амалдары басталды. Сонымен бірге сот-медициналық сараптама тағайындалды. Мемлекеттік еңбек инспекторы мән-жайды анықтап жатыр», - деді ведомстводан.

Айта кетсек, бұдан бұрын 2 саусағынан айырылған ақмолалық жұмыс берушіден өтемақы өндіріп алғанын жазған едік.