Баскетболдан әйелдер командалары арасындағы Қазақстан чемпионатында павлодарлықтар көш бастап келеді

АЛМАТЫ. Қарашаның 27-сі. ҚазАқпарат /Ерлік Ержанұлы/ - Бүгін Алматыда  баскетболдан әйелдер командалары арасындағы Қазақстан чемпионатының 2-ші тур ойындарының ақтық кездесулері өтеді,

деп хабарлайды ҚазАқпарат.

Қарашаның 23-інде басталған екінші тур ойындарында әзірге Павлодар мен Астана қалаларының командалары жеңіліссіз келе жатыр. Павлодардың «ЕртісПНХЗ» баскетболшылары  «тараздықтарды» 99:32, «оқжетпестіктерді»  - 74:56, «алматылықтарды» - 85:51 есебімен тізе бүктіріп, турнир кестесіндегі көшбасшылықтарын сақтап қалды. Астананың «КАТУ жолбарыстары»  «Таразды» - 84:31, «Алматыны» - 65:35, ал көкшетаудың «Оқжетпесін»  - 65:59 есебімен ұтып, 7 ойыннан кейін 13 ұпаймен павлодарлықтарды өкшелеп  келе жатыр. Оларды 1 ұпай ғана ажыратып тұр. Енді екінші турдың ақырғы ойындары  «Оқжетпес» пен «Тараз», «КАТУ жолбарыстары»  мен «ЕртісПНХЗ»  арасында өтеді. Өзгелерден 1 ойыны артық алаң иелері қазір  9 ұпаймен тараздықтарды ғана артқа қалдырып, турнир кестесінде 4-ші орында келе жатыр.  Олар 2 турдың жалпы қорытындысы бойынша  өз алаңында 77:46 есебімен тек тараздықтардан ғана басым түсті.