Баспананы жалға алған жас отбасы айына қанша ақша төлейді
НҰР-СҰЛТАН. ҚазАқпарат - Жастарға берілетін жалдамалы пәтер үшін отбасы айына 12 мың теңге төлеп тұратын болады. Бұл туралы бүгін Үкімет үйіндегі баспасөз мәслихатында ҚР Ақпарат және қоғамдық даму вице-министрі Жұлдыз Омарбекова айтты, деп хабарлайды ҚазАқпарат тілшісі.
«Жас адамның өмірлік кезеңі бар. Ол білім алады, жұмысқа тұрады және содан кейінгі мәселе - оның шаңырақ көтеруі. Бізде ажырасу деңгейі жоғары болып тұр. Баспана отбасындағы негізгі проблема болмаса да, солардың бірі екендігі түсінікті. Биыл жалдамалы пәтерлер бағдарламасын іске қостық. Нұр-Сұлтан, Алматы және Шымкент қалаларының әрқайсысында 1 мыңнан пәтер беріледі. Оған сатып алу құқығы берілмейді. Жас отбасы аяғынан тұрып кеткенше мүмкіндік жасалады. Бізде «7-20-25», Тұрғынүйқұрылысжинақбанкі, «Бәйтерек» желілері бойынша мемлекеттік бағдарламалар бар. Бірақ, олардың барлығында да баспана алу үшін бастапқы қаражат жинау қажет. Ал тапқан табысыңның бәрі пәтер жалдауға кетсе, қалай қаражат жинай аласың?», - деді Жұлдыз Омарбекова.
Осы орайда вице-министр жастарға жалдамалы пәтер беруге арналған бағдарламаны теңдесі жоқ акция деп санайтынын айтты.
«Қыркүйекте құжат жинау басталады. Баспана алу ережесі біздің сайтымызда 1 тамызда жария етіледі. Бұл - ең алдымен 29 жасқа дейінгі азаматтарға берілетін мүмкіндік. Егер оның отбасы болса немесе қарауында мүгедек ата-анасы не мүгедек баласы болса, онда қосымша бонус беріледі. Жалдамалы пәтер 3-тен 5 жылға дейінгі мерзімге арналған. Қазіргі уақытта жергілікті атқарушы органдармен және басқа да министрліктермен шарттар жасалып жатыр», - деді ол.
Сонымен қатар ол жастар жалға алған пәтерге ай сайын төлейтін болжамды соманы атады.
«Сіз жалдамалы пәтерге айына шамамен 10-12 мың теңге төлейсіз. Бұл - ақша жинауыңызға мүмкіндік беретін сома. Пәтер алу үшін ең маңызды шарт - Тұрғынүйқұрылысжинақбанкінен есепшот ашу, мемлекеттік бағдарламаға қатысу. Яғни, біз баспана сатып алғыңыз келетінін, қаржы жинап жатқаныңызды көруіміз керек. Бағдарлама өмірді енді бастаған жас отбасылар мен жастарды қолдауға арналған. 3-5 жылдың ішінде ипотека алу үшін ең төменгі жарнаны жинауға болады. Одан кейін ол отбасылық немесе еңбек жолын жаңа бастаған, көмекке мұқтаж келесі жастарға пәтерді босатып беруі тиіс», - деді вице-министр.
