Батыс Қазақстанда полиция қызметкері автокөлігімен ер адамды қағып өлтірді

ОРАЛ. KAZINFORM - Батыс Қазақстан облысында полиция қызметкері автокөлігімен ер адамды қағып өлтірді.

БҚО полиция департаментінің баспасөз қызметінен мәлім еткеніндей, оқиға Орал қаласына қарасты Меловые горки ауданында болды.

Алдын ала мәлімет бойынша жол-көлік оқиғасы жолдың жарықтандырылмаған бөлігінде болған. Қарсы келе жатқан автокөліктің жарығы жүргізушінің көзін қарықтырып жіберген.

- Автокөлік рулінде полиция қызметкері болды. Медициналық куәландыру оның ішімдік ішпегенін көрсетті. Полиция қызметкері ішкі істер органынан қуылды. Қызметтік тексеру жүргізілуде. ҚР ҚК 345-бабы 3-бөлігіне сәйкес қылмыстық іс қозғалды. Басқа ақпарат ҚР Қылмыстық іс жүргізу кодексінің 201-бабына сәйкес жариялауға жатпайды, - деп хабарлады ведомстводан.

Еске сала кетейік, бұдан бұрын Оралда колледж студентінің мәйіті табылғанын жазған болатынбыз.