Батыс Қазақстанда 24 млрд теңгенің жол құрылысы жұмыстары атқарылмақ
ҚР Индустриялар және даму министрінің орынбасары Роман Склярдың өңірге жұмыс сапары кезінде мәлім еткеніндей, соның ішінде 16 млрд. теңге республикалық, 8 млрд. теңге жергілікті маңызы бар жолға жұмсалмақ. Облыста «Нұрлы жол» бағдарламасына сәйкес Орал-Тасқала-РФ шекарасы жолы қайта салынып жатқаны белгілі. Биыл осы жолдың 50 шақырымы іске қосылмақ. Жалпы құны 23 млрд. теңгеге есептелген бұл жол құрылысы алдағы жылы мәреге жетпек. Биыл сондай-ақ республикалық маңызы бар Чапаев-Жалпақтал, Қазталов-Жәнібек жолының 20 шақырымы күрделі жөнделмек. 123 км жол орташа жөндеумен қамтылады. Оған қоса жалпы ұзындығы 126 км жергілікті жолдар жөнделмек. Соның ішінде Бөрлі-Ақсай-Жымпиты жолының 15 шақырымы, Орал-Кирсанов, Чапаев-Жаңақала-Сайқын, Барбастау-Ақжайық-Индер бағытындағы жолдар бар. Барлық нысандарда 4 мыңдай адам жұмыс жасамақ.
Еске сала кетейік, өткен жылы облыста 23,5 млрд. теңгеге 290 км астам жол жөнделген болатын, бұл 2015 жылғыдан 5 млрд. теңгеге артық.