Батыс Қазақстанда әйел екі ұлымен бірге Жайық өзеніне батып кетті
ОРАЛ. ҚазАқпарат - Батыс Қазақстан облысында тағы үш адам суға батып кетті, деп хабарлайды ҚазАқпарат тілшісі.
БҚО ТЖ департаментінің баспасөз қызметінен түскен мәліметке қарағанда, оқиға 4 шілде күні Бөрлі ауданы Жарсуат ауылында болды.
Сағат 19.00-де Жайық өзенінен 36 жастағы әйел оның 7 және 5 жасар ұлының денесі табылған. Әйел киімшең, балалары шешінген күйінде болған.
Олардың денесін жергілікті тұрғындар шығарып алған. Бұл туралы хабар сағат 20.40-та түсті.
Қазіргі кезде оқиғаның жай-жапсары анықталу үстінде. Қаза тапқандар - Ресей Федерациясының тұрғындары.
Осылайша Батыс Қазақстан облысында суға кеткендер саны 17-ге жетті. Оның жетеуі - балалар.
Еске сала кетейік, бұдан бұрын Батыс Қазақстан облысында сегіз жасар баланың суға кеткенін жазған болатынбыз.
Сондай-ақ Оралда әкесі қызын құтқарам деп екеуі де суға кетті.
