Батыс Қазақстанда бір күнде екі адам суға кетті

ОРАЛ. ҚазАқпарат – Батыс Қазақстан облысында бір күнде екі адам суға кетті, деп хабарлайды ҚазАқпарат тілшісі.

БҚО ТЖ департаментінің баспасөз қызметінен түскен мәліметке қарағанда, 20 шілде күні сағат 15.00-де Тасқала ауданы Тасқала ауылында 2008 жылғы жасөспірім Деркөл өзеніне батып кетті.

Ол шомылуға жабдықталмаған жерде суға түскен. Баланың денесін құтқарушылар (4 қызметкер, 1 жүзу құралы, 1 техника) сағат 17.40-та алып шықты.

Тағы бір оқиға 20 шілде күні Оралға қарасты Деркөл ауылында болды. 1960 жылғы ер адам сағат 20.30-да белгісіз жағдайда Деркөл өзеніне батып кеткен. Оның мүрдесін құтқарушылар (4 қызметкер, 1 техника) сағат 21.20-да судан шығарды.

Еске сала кетейік, бұдан бұрын Батыс Қазақстанда тағы үш адамның суға кеткенін жазған болатынбыз.