Батыс Қазақстанда бір күнде екі тұрғын үй өртенді
БҚО ТЖ департаментінің баспасөз қызметі мәлім еткеніндей, оқиғаның біреуі 10 желтоқсан күні Тасқала ауданы Тасқала ауылында болды.
Сағат 22.40-та Қ.Аманжолов көшесі 11-мекенжайында тұрғын үйде өрт шыққаны жөнінде хабар түскен.
Өрт салдарынан тұрғын үй кіреберісінің 30 шаршы метр шатыры жанып кетті.
Өрт сөндірушілердің ұтымды іс-қимылы нәтижесінде оттың көршілес пәтерге ұласуына жол берілген жоқ. Оған қоса 1 газ баллоны шығарылып, оның жарылу қаупі жойылды.
«Тілсіз жау» бүгін сағат 01.55-те ауыздықталды.
Сол секілді кеше сағат 23.52-де- Оралдағы «Любители природы» бау-бақша қауымдастығының 30-мекенжайында жеке тұрғын үй отқа оранды. Аумағы 90 шаршы метрді құраған өрт бүгін сағат 02.00-де толықтай сөндірілді.
ТЖ департаменті тұрғындарға өрт қауіпсіздігі ережелерін бұлжытпай сақтау керектігін ескертеді.
Биыл жыл басынан бері облыста 588 өрт оқиғасы тіркелсе, соның 358-і тұрғын үй секторында болды. Өрттен 6 адам қаза тауып, 8-і түрлі жарақат алды.
Өрттен 605 мың теңге материалдық шығын келтірілді.
Еске сала кетейік, бұдан бұрын БҚО-да 8 тонна пішен мен қора-қопсы өртеніп кеткенін жазған болатынбыз.