Батыс Қазақстанда боранға байланысты барлық жолдар жабылды
ОРАЛ. ҚазАқпарат - Батыс Қазақстан облысында боранға байланысты барлық бағыттағы жолдар жабылды, деп хабарлайды ҚазАқпарат тілшісі.
БҚО ТЖ департаментінен түскен мәліметке қарағанда, жергілікті сағат 19.00-ден бастап осындай шешім қабылданды.
Алдымен бүгін республикалық маңызы бар Орал-Тасқала-РФ шекарасы бағытында қозғалысқа шектеу қойылса, содан кейін Тасқала-Аққурай-Болашақ, Орал-Кирсанов, Чапаев-Жалпақтал-Қазталов-Жәнібек-РФ шекарасы, Өнеге-Бисен-Сайқын және басқа жолдар түгел жабылды.
Өңірде қатты боранға қоса жолдарда көктайғақ орын алып отыр.
Еске сала кетейік, бұдан бұрын БҚО-да ауа райына байланысты ескерту жарияланғанын жазған болатынбыз.
