Батыс Қазақстанда Орал-Атырау жолы жабылды

ОРАЛ. ҚазАқпарат – Батыс Қазақстан облысында Орал-Атырау жолы жабылды, деп хабарлайды ҚазАқпарат тілшісі.

«ҚазАвтоЖол» ҰК» АҚ БҚО филиалының мәліметі бойынша республикалық маңызы бар аталмыш жолда күшті боранға байланысты 22 желтоқсан күні жергілікті сағат 23.00-ден бастап барлық көлік түрлері үшін қозғалысқа шектеу қойылды.

Жол Орал қаласынан Ақжайық ауданы орталығы Чапаев ауылына дейінгі аралықта жабылды.

Осыған орай БҚО ТЖ департаменті ескерту жариялап, хабарламалар таратуда.

ТЖ департаменті сондай-ақ 23 желтоқсан күні түнде өңірдің солтүстігі мен солтүстік-шығысында жаяу бұрқасын көтерілетінін жеткізді. Солтүстік-батыстан, батыстан соғатын желдің жылдамдығы секундына 15-20 метрге жетуі ықтимал.

Орал қаласында да осындай ауа райы орын алмақшы.

Еске сала кетейік, бұдан бұрын Батыс Қазақстанда республикалық жол жабылғанын жазған болатынбыз.