Батыс Қазақстанда республикалық және облыстық жолдарда қозғалысқа шектеу қойылды
ОРАЛ. ҚазАқпарат – Батыс Қазақстан облысында ауа райының нашарлауына байланысты республикалық және облыстық жолдар жабылды, деп хабарлайды ҚазАқпарат тілшісі.
«ҚазАвтоЖол» ЖШС БҚО филиалының мәліметі бойынша 22 ақпан күні жергілікті сағат 20.00-ден бастап республикалық маңызы бар Атырау-Орал (492-189 км, Оралдан Атырау облысына дейін), Чапаев-Жалпақтал-Казталов (0-213 км, Чапаевтан Казталовқа дейін), 21.30-дан кейін Орал-Тасқала-РФ шекарасы (Оралдан Ресей шекарасына дейін) жолдарында барлық көлік түрлері үшін қозғалысқа шектеу қойылды.
Сондай-ақ БҚО жолаушылар көлігі және автомобиль жолдары басқармасының мәліметіне сәйкес сағат 21.00-ден бастап облыстық маңызы бар Чапаев-Жаңақала-Сайқын (0-337 км, Чапаевтан Сайқынға дейін), Тасқала-Аққурай-Болашақ-РФ шекарасы (0-157 км, Тасқаладан Ресей шекарасына дейін), Үлкен Шаған-Переметный (0-42 км, Үлкен Шағаннан Переметныйға дейін), Орал-Кирсанов (1-83 км, Оралдан Кирсановқа дейін), Жымпиты-Қаратөбе (0-103, Жымпитыдан Қаратөбеге дейін) жолдары да жабылды.
БҚО ТЖ департаменті жабылу себебі өңірде қалың тұман түсіп, соның салдарынан жолдың көрінуі нашарлағанын, соған байланысты ескерту жарияланғанын жеткізді.
Еске сала кетейік , бұдан бұрын БҚО-да тұманға байланысты бірнеше республикалық жол жабылғанын жазған болатынбыз.
Сондай-ақ екі автокөлік соқтығысып, 60 жастағы әйел мерт болды.
