Батысқазақстандық балғын спортшы халықаралық жарыстан олжалы оралды
ОРАЛ. 9 қараша. ҚазАқпарат /Елжан Ералы/ - Батысқазақстандық балғын дзюдошы Тоқтар Үмітәлиев халықаралық бәсекеден алтын медаль иеленіп қайтты.
Ресейдің Пермь аймағының Чернушка қаласында өткен дзюдодан ІІІ халықаралық ашық турнирге РФ, Беларусь, Украина, Қазақстанның 1997-1999 жылы туылған спортшылары қатысқан.
-Турнирде 34 келі салмақпен алты жекпе-жекке қатыстым. Тәжірибе жинақтап, көрші елден жақсы әсерде оралдым, - дейді Тоқтар.
Он үш жасар спортшы Оралдағы жекпе-жек спорты түрлерінен олимпиадалық резервінің мамандандырылған балалар мен жасөспірімдер мектебінде төрт жылдан бері дзюдомен шұғылданып келеді.
