Батысқазақстандық белгілі ғалым Т.Рысбеков «Білім маршалы» атанды
ОРАЛ. 31 желтоқсан. ҚазАқпарат - Батысқазақстандық белгілі ғалым, тарих ғылымдарының докторы, профессор, академик, Қазақстанның еңбек сіңірген қайраткері Тұяқбай Рысбеков үшін 2013 жыл ерекше жемісті болды.
Жуырда ғалым арнайы шақырумен Париж қаласына барып қайтты. Онда Т.Рысбековке ғылым саласындағы айрықша жетістігі үшін салтанатты жағдайда Наполеон медалі табыс етілді. Бұл жоғары награданы халықаралық ұйым - ұлттық өнеркәсіпті қолдаушы ассоциация (SEIN) тағайындаған және білім мен экономика саласындағы ерекше еңбегі үшін беріледі. SEIN 1801 жылы Наполеон Бонапарттың жарлығы бойынша құрылған. Ассоциацияның жоғары марапаты SPI алтын медалі 2005 жылы БҚМУ-ға берілген болатын. Ол кезде Т.Рысбеков осы оқу орнының ректоры еді. Биылғы жылы осы медальді Т.Рысбековпен бірге SEIN президенті Оливье Муссонның қолынан еліміздің тағы екі өкілі алды. Олар - белгілі шарап өндіруші Артуш Карапетян және Астана қаласынан медицина ғылымдарының кандидаты Дина Тұрақбаева.
Профессорға медальмен бірге "Білім маршалы" атағы берілгені жөнінде сертификат табыс етілді. Ғалымды Парижден оралғанда тағы бір марапат күтіп тұрды. Халықаралық Сократов комитетінің (Оксфорд, Ұлыбритания) шешімімен ол Еуропалық Бизнес Ассамблея «Best Scientist» («Озат ғалым») халықаралық байқаудың жеңімпазы атанды. Оған қоса оның ғылыми еңбегі
2013 жылғы Сократов жинағының 78-бетіне жарияланды. Биыл Тұяқбай Зейітұлы көптеген халықаралық конференцияларда, соның ішінде Ганновер (Германия), Санкт-Петербор, Краснодар, Екатеринбург, Якутск, Астана және Орал қалаларында өткен жиындарда баяндама жасады. Жыл ішінде оның жетекшілігімен 3 магистр даярланып, 30-дан астам ғылыми-әдістемелік мақалалар жарияланды.
Т.Рысбеков - оннан астам монография, 400-дей ғылыми еңбектің авторы, «Парасат» орденінің иегері, Орал қаласының құрметті азаматы. Сондай-ақ облыстық мәслихаттың депутаты ретінде өңірдің әлеуметтік-экономикалық дамуына, өзекті мәселелерінің дер кезінде шешілуіне өз үлесін қосып келеді.
