«Бауыр» фильмі халықаралық кинофестивальде жүлделі болды
АСТАНА. ҚазАқпарат - Серік Апрымовтың «Бауыр» фильмі Нэшвиллде (АҚШ) өткен 45-ші халықаралық кинофестивальде «Үздік фильм» санаты бойынша марапатқа ие болды, деп хабарлайды «Қазақфильм» АҚ баспасөз қызметінен.
Нэшвиллдегі халықаралық кинофестиваль 1969 жылдан бері өткізіліп келеді және АҚШ-тағы ең көне кинофестивальдердің бірі болып саналады. Жыл сайын фестивальге әлемнің 40-тан елінен 200-ге тарта фильмдер көрсетіледі. Биылғы жылы фесивальге 3100-ден астам өтінім келіп түскен екен. Жалпы 100 мыңнан астам адам қатысқан.
Естеріңізге сала кетейік, «Бауыр» фильмі ең алғаш 70-ші халықаралық Венеция кинофестивалінің «Көкжиектер» бағдарламасында көрсетілген болатын. Аталмыш кинофестивальден кейін «Бауыр» фильмі IX халықаралық «Еуразия» кинофестивалінің негізгі байқауына қатысып, екі бірдей жүлдеге - «Үздік режиссер» және НЕТПАК жүлделеріне қол жеткізді. Сонымен қатар, «Бауыр» фильмі Австрияда өткен халықаралық «Viennale» кинофестиваліне қатысты.
