Байбек: ЭКСПО қонақтарының көбі Алматыға соғып кетеді
АЛМАТЫ. ҚазАқпарат - Алматы әкімі Бауыржан Байбек бүгін салтанатты түрде ашылған Халықаралық туристік көрменің басты қонақтарының бірі болды, деп хабарлайды ҚазАқпарат тілшісі.
Жиынның ашылуында сөз алған Бауыржан Байбек биылғы көрмеге 30 елден 500 қатысушы келгенін айтты.
«Алматы былтыр ЮНЕСКО аясында өзінің 1 000 жылдығын атап өтті. Біз биыл қысқы Универсиаданы өткіздік. Біз еліміздің туристік мүмкіндіктерін көрсете алдық. Биыл 17-ші рет өткізіліп отырған қазақстандық халықаралық көрме - аймақтағы ең ірі шара. Биыл 30 елден 500 қатысушы келіп отыр. Көрмені биыл 4 мың адам тамашалайды деп күтіп отырмыз. Туризмге мән берген елдер өз өнімдерін таныстырып отыр. Қазақстан да бұл салада өз орнын табуға тырысып отыр. Қазақстанға келген туристер Алматыға соқпай кетпейді. ЭКСПО-ға келген қонақтардың дені Алматыны көрмей кетпейді деп ойлаймыз», - деді Алматы әкімі Бауыржан Байбек.
Қала басшысы көрмеде Алматыны таныстырған стендті тамашалады. Сонымен қатар, әкім шетелдік қатысушылардың стендеріне жоғары баға берді. 
