«Бәйтерек» холдингі Қытайдан қанша юань қарыз алғаны түсіндірілді

АСТАНА. KAZINFORM – «Бәйтерек» ҰБХ басқарма төрағасы Рустам Қарағойшин Қытайдан қанша юань қарыз алғанын және оны қайда жұмсайтынын айтып берді.

Кеше «Бәйтерек» холдингі алғаш рет Қытайдан юань валютасымен қарыз алғаны хабарланған еді. 

− Бұл - өте маңызды оқиға және әзірге тек қана басы. (Қарыз) көлемі — 400 миллион юань. Бірақ мұның маңыздылығы — біз алған юань құны өте жақсы, біздің инвестициялық жобаларға сәйкес құнын құрайды. Қазір Қытай тарапының келісімнен шыға алмаймын және кейбір деректерді аша алмаймын. Бірақ ақыр аяғында оны 7-8 пайыз юаньда 10-15 жылдық жобаларға жібереміз, − деді холдингтің басқарма төрағасы Рустам Қарағойшин Үкіметте өткен брифингте.

Спикердің айтуынша, бұл қаражат әзірге ауыл шаруашылығы саласына, оның ішінде өсімдік саласына жұмсалды.

Айта кетейік, биыл Үкімет «Бәйтерек» холдингінің экономикалық жобаларға құятын капитал көлемін 1 трлн теңгеге ұлғайтады.