Бек Нұрмағанбет нокаутпен жеңісінен кейін WBA рейтингінде көтерілді
АСТАНА. ҚазАқпарат – Екінші орта салмақтағы қазақстандық кәсіпқой боксшылар Бек Нұрмағанбет пен Айдос Ербосынұлының Дүниежүзілік бокс қауымдастығының (WBA) рейтингісіндегі орны белгілі болды, деп хабарлайды ҚазАқпарат.
Бек Нұрмағанбет (8-0, 6 КО) 22 қазан күні Мехикода өткен бокс кешіне қатысып, онда жергілікті боксшы Лусиано Араухоны (6-6-3, 3 КО) нокаутқа түсірген болатын. Кazproboxing Instagram-парақшасында мәлім етілгендей, осы жеңісінен кейін қазақстандық спортшы екінші орта салмақтағы WBA рейтингінде 11-ден 10-орынға көтерілді.
Осы дивизиондағы Айдос Ербосынұлы (16-0, 11КО) бірінші орында қалды. Екінші позицияда – америкалық Калеб Плант, үшінші орында Канада өкілі — Эрик Базинян.
WBA-дің әлемнің «суперчемпионы» белдігіне мексикалық Сауль «Канело» Альварес ие. «Қарапайым» чемпион – кубалық кіші-Давид Моррель (7-0, 6 КО). Айта кетейік, А.Ербосынұлы биылғы 5 қарашада Давид Моррельге қарсы жекпе-жекке шығады. Айқас АҚШ-тың Миннеаполис қаласында өтеді.
