«Бекіре – 2025»: Еліміздің батысында кеңауқымды балық қорғау акциясы басталды
АТЫРАУ. KAZINFORM – 1 сәуірде еліміздің батысындағы Атырау, Маңғыстау және Батыс Қазақстан облысында «Бекіре – 2025» балық қорғау акциясы басталды. Кеңауқымды акцияға 1500-ге жуық қызметкер қатысады.
Балық шаруашылығы комитетінің төрағасы Серік Сермағамбетовтің айтуынша, балық қорғау акциясы 31 мамырға дейін жалғасады.
– Бұл кезеңде табиғат және құқық қорғау органдарының қызметкерлері бағалы бекіре тұқымдас балық түрлерін браконьерлерден қорғап, уылдырық шашуын қамтамасыз етеді. Өйткені жыл сайын бекіре тұқымдас балықтардың саны азайып барады. Сол себептен Ауыл шаруашылығы, Ішкі істер министрлері мен Ұлттық қауіпсіздік комитеті төрағасының «Бекіре» балық қорғау акциясын өткізу туралы бірлескен бұйрығына қол қойылды. Соған сәйкес балық қорғау акциясын үйлестіру штабы құрылып, оған жетекшілік ету Балық шаруашылығы комитетіне жүктелді, - деді Серік Сермағамбетов.
Оның мәліметіне сүйенсек, балық қорғау акциясын өткізуге 1466 қызметкер жұмылады. Оның ішінде Атырау облысында 604, Батыс Қазақстанда – 222, ал Маңғыстау өңірінде 640 қызметкер су айдындарында қадағалау жүргізеді. Сондай-ақ 298 автокөлік, 84 қайық пен шағын көлемді кеме, 6 ұшу аппараты, техникалық құралдар тартылған.
Шекара қызметі Атырау облысы бойынша департаменті бастығының бірінші орынбасары Айдос Кикабаевтың дерегіне қарағанда, браконьерлік жиі болатын аумақтарда стационарлық және жылжымалы бекеттер, мобильді топтар ұйымдастырылады.
– Каспий теңізінің жағалауы мен акваториясында, Жайық пен Қиғаш өзендерінің сағасында бақылау күшейтіледі. Әуежайлар, вокзалдар мен автожолдарда балық пен балық өнімдерін заңсыз тасымалдауға қарсы іс-шаралар жүргізіледі. Біздің негізгі міндетіміз – мемлекеттік шекара маңында браконьерлік әрекеттерді дер кезінде анықтау. Біз бақылау бекеттерінің жұмысын күшейтіп, Жайық-Каспий су бассейнінде, өзен-көлдерде патрульдеу жұмысын жалғастырамыз, - деп мәлім етті Айдос Кикабаев.
Еске сала кетелік, бұған дейін Атырау тұрғынының көлігінен 1,5 келі бекіре уылдырығы тәркіленгенін жазған болатынбыз.
