Бес мыңнан астам адамның қаржысын тартқан «HAS» қаржы пирамидасын ұйымдастырушылар сотталды

АСТАНА. KAZINFORM – Өздерін сыртқы экономикалық қызметпен айналысатын компания ретінде таныстырған күдіктілер азаматтарды түрлі инвестициялық жобаларға ақша салуға үгіттеп, ай сайын 70%-ға дейін пассивті табыс алуға уәде берген, деп хабарлайды ҚР Қаржылық мониторинг агенттігінің баспасөз қызметі.

Баспасөз қызметінің мәліметтеріне қарағанда, әлеуметтік желілерде жалған акциялар белсенді түрде жарияланып, оның ішінде Астана мен Қосшы қалаларында тұрғын үй салу туралы ақпарат таралған.

Белсенді құрылыс иллюзиясын жасау үшін декорациялар мен арнайы техника жалданған.

Нәтижесінде қаржылық пирамидаға 5 мыңнан астам салымшы тіркелген.

Сот 5 қатысушыны 6 жылдан 12 жылға дейін бас бостандығынан айыруға үкім шығарды.

Сонымен қатар, зардап шеккендерге келтірілген зиянды өтеу үшін салымшылардың ақшасына алынған 1 миллиардтан астам теңге құны бар мүлік тәркіленді.

Активтер қатарында — 4 пәтер, 18 автокөлік, 3 жер учаскесі, автотұрақ орындары, коммерциялық емес ғимарат және есепшоттардағы ақша қаражаттары бар.

Айта кетейік, Агенттікте қаржы пирамидаларының белгілерін тексеруге мүмкіндік беретін «Baiqa, piramida!» Telegram-боты іске қосулы.

Осыған дейін ҚМА 250 адам 300 миллионға жуық теңге салған «Buyers Union» қаржы пирамидасының жұмысын тоқтатқанын хабарлады.