Бес тіл білетін жас маман жастарға тіл үйретуді өзіне мақсат тұтқан
АСТАНА. ҚазАқпарат - Абылай хан атындағы Халықаралық қатынастар және Әлем тілдері университетінің түлегі Әсем Танысбекова бүгінде қазақ тілінен бөлек, орыс, ағылшын, поляк және испан тілдерін еркін меңгерген. Жас маман көптеген шетелдік компаниялар қызметке шақырса да бармай, жастарға тіл үйретуді өзіне мақсат тұтқан, деп жазады «Айқын» газеті.
«Жер бетіндегі 2 миллиардқа жуық адам ағылшын тілінде сөйлесе, жылына 55 мыңнан астам пайдалы әдебиеттер шығады екен.
Ал негізгі ғылыми кітаптардың 33 пайызы ағылшын тіліне міндетті түрде аударылады. Осыдан-ақ, ағылшын тілін білетін адамның асығы алшысынан түсетінін пайымдай беруге болады. Бүгінде елімізде шетелден іздегені - ілім, көздегені білім болған жастардың қатары артып келеді», делінген мақалады.
Олардың түгелі дерлік ағылшын тілін меңгеріп, тең жартысы қосымша тіл үйренуде. Сондай жастардың бірі Әсем Танысбекова «Ағылшын тілі - әлемдегі көп таралған тіл. Жастар еліміздің сыртқы саясаты мен экономикасын дамыту мақсатында мейлінше, тіл үйренгені дұрыс. Ал қазақ, орыс, ағылшын тілін жетік меңгергені абзал» дейді. Тек ағылшын тілін білу арқылы әлемдегі 2 миллиардқа жуық адаммен еркін коммуникация жасауға жол ашылады. Бизнес, туризм, ғылым, білім беру жүйесі, интернет, кинемотография және тағы басқа әлемнің түрлі саласында ағылшын тілі қолданылып, көптеген әлемдік жобалар, саяси кездесулер мен жиындар, спорттық жарыстар мен олимпиадалар ағылшын тілінсіз өтпейтіні жасырын емес.
2010 жылы Абылай хан атындағы Халықаралық қатынастар және Әлем тілдері университетінің шет тілі филологиясы мамандығына түсіп, поляк тілін меңгерген Әсем Польша мемлекеті консулдығы ұйымдастырған Jaka jest piekna Warszawa w lipcu («Шілдедегі Варшаваның әсемдігі») бағдарламасы бойынша 3 апталық жолдама алады. Кейіннен осы өкілдік ұйымдастырған Jezyk i kultura Polski («Польшаның тілі мен мәдениеті») бағдарламасымен Варшава қаласына 6 айлық оқуға кетеді. Бұдан бөлек, Әсем университет қабырғасында жүріп қосымша испан тілін үйренеді.
Оқуын тәмамдап, елге келгеннен кейін Польша мемлекеттік заң фирмасының еліміздегі бөлімшесінде аудармашы болып қызмет атқарады. Уақыт өте еліміздің жастарына шетелден алған білімін үйрету арқылы, қазаққа пайдасын тигізуді ойлаған Әсем үш жылдан бері тіл үйрететін «Международник» мектебінде поляк тілінен сабақ береді. «Жастардың тіл білуге деген ұмтылысы жоғары. Поляк тілін үйренуге келген балалардың тіл меңгеруге қабілеті, бейімі бар. Оқушыға ерте жастан тіл үйреткеннің пайдасы зор. Жаратылыстану және гуманитарлық пәндерді бірден ағылшын тілінде оқыту қиындық тудыруы мүмкін. Дегенмен, қазақ балалары тілдерді меңгеруде жоғары көрсеткішке ие» дейді педагог-маман.
Бүгінде қазақ тілінен бөлек, орыс, ағылшын, поляк және испан тілдерін еркін меңгерген жас маман көптеген шетелдік компаниялар қызметке шақырса да, жастарға тіл үйретуді өзіне мақсат тұтқан. «Арманым - бірнеше тіл білетін, сауатты жастардың қатарын көбейту» дейді Әсем Танысбекова.
Асыл ТҰМАР
