Бейбіт Атамқұлов әуе бағдарларын субсидиялауға қатысты түсінік берді
НҰР-СҰЛТАН. ҚазАқпарат – Индустрия және инфрақұрылымдық даму министрі Бейбіт Атамқұлов әуе бағдарларды субсидиялауға қатысты түсінік берді, деп хабарлайды ҚазАқпарат тілшісі.
«2020 жылға шығыстар біраз өсіп жатыр, 5 млрд 900 миллион теңгеге дейін. 2018 жылы бұл бағдарлама басталғанда 2 млрд 100 млн теңге бөлінген, яғни бұл қаржы 14 ішкі әуе бағыттарына арналды», - деді Б. Атамқұлов Мәжілістің жалпы отырысында.
Белгілі болғандай, бүгінде 14 ішкі әуе бағдары, сондай-ақ «Нұр-Сұлтан – Токио» бағытындағы халықаралық бағдары субсидиялануда.
Министрдің сөзіне қарағанда, 2019 жылы жанар-жағармай бағасының өсуімен 2,7 млрд теңге көлемінде болды. 2019 жылдың ортасында «Нұр-Cұлтан-Токио» бойынша тағы бір әуе бағдары қосылды (субсидиялауға). «Осы бағдарға жарты жылға субсидия 1 млрд 500 млн теңге көлемінде қарастырылды. Келесі жылы толық шығыс 2 млрд 900 млн теңге болып тұр. Осы орайда нақты нәтиже көруіміз керек. Бүгінгі күні ел тұрғындарына әуе билеттері бойынша жеңілдіктер беріп отырмыз. Келесі жылы бес әуе бағыты өзін-өзі ақтау деңгейіне шығады, яғни 80 пайыз шамасында болады. 2020 жылдың нәтижесімен біз субсидияны азайта бастаймыз. 2021 жылғы бюджеттік жоспарда субсидияға шығаратын қаржыны екі миллиардқа дейін төмендетуді көздеп отырмыз», - деді министр.
