Бейнеу ауданы экологиялық зілзала аймағы деп таныла ма
АСТАНА. ҚазАқпарат – Үкімет басшысы Әлихан Смайылов Сенат депутаттарының Маңғыстау облысы Бейнеу ауданының аумағын Арал өңіріндегі экологиялық қасірет салдарынан зардап шеккен аймақ деп жариялауға қатысты сауалына жауап берді, деп хабарлайды ҚазАқпарат тілшісі.
«Осы мәселені жедел шешу үшін төтенше экологиялық жағдай аймағы немесе экологиялық зілзала аймағы деп жариялануы болжанатын аумақты зерделеу мақсатында зерттеулерді Қазақстан Республикасы Бюджет кодексінің 64-бабына сәйкес жергілікті бюджет қаражаты есебінен қаржыландыру мүмкін болады. Оған сай қоршаған ортаны қорғау жөніндегі іс-шараларға жергілікті бюджетке түскен қоршаған ортаға жағымсыз әсер еткені үшін төлемақының кемінде жүз пайызы мөлшерінде қаражат жіберіледі», - деп атап өтеді Әлихан Смайылов жауабында.
Оның атап өтуінше, осыған байланысты Қазақстан Республикасы Экология кодексінің 405-бабының 1-тармағына сәйкес Маңғыстау облысының әкімдігіне тиісті комиссия құру мәселесін пысықтау тапсырылды.
«Жүргізілген зерттеулердің нәтижелері бойынша және қоршаған ортаны қорғау саласындағы уәкілетті органның мемлекеттік экологиялық сараптамасының оң қорытындысына, сондай-ақ денсаулық сақтау, білім және ғылым саласындағы уәкілетті мемлекеттік органдардың қорытындыларына сәйкес аумақ: Қазақстан Республикасы Үкiметiнiң қаулысымен – төтенше экологиялық жағдай аймағы; Қазақстан Республикасының заңымен – экологиялық зiлзала аймағы деп жарияланады. Маңғыстау облысы Бейнеу ауданының аумағы төтенше экологиялық жағдай аймағы немесе экологиялық зілзала аймағы деп танылған жағдайда заңнамада белгіленген тәртіппен тиісті іс-шаралар қабылданатын болады», - деді Үкімет басшысы.
