Биыл жаңа астықты кептіруге шаруаларға алғаш рет сұйытылған газ бөлінді

ПЕТРОПАВЛ. KAZINFORM — Солтүстік Қазақстан облысында егін орағы басталғалы диқандар бар алқаптың тек 18% ғана жинап үлгерді. Нәтижесінде бір млн тоннаға жуық бидай бастырылды.

СҚО ауыл шаруашылығы және жер қатынастары басқармасының басшысы Мейрам Меңдібаевтың айтуынша, биыл әр гектардан 17,3 центнерден өнім алынып жатыр.

Былтыр өнімділік — 12 ц/га болды. Бірақ егін орағы өте баяу жүріп жатыр. Оған себеп — ауа райы.

«Қыркүйек айы басталғалы жауын-шашынның айлық орташа көрсеткішінің 57% жауды. Синоптиктердің болжамынша алда күн ашық болады. Сондықтан диқандар мұны барынша пайдаланады. Былтыр осы уақытта бір млн га жуық алқаптың астығы жиналған еді. Биыл соның жартысы ғана орылды», — дейді Мейрам Меңдібаев. 

Өңір элеваторларына 180 мың тонна дәнді дақыл түсті. Жеткізілген бидайдың жартысы 3 класқа жатады. 

«Астық қабылдау орындарына бидай жоғары ылғалмен түсіп жатыр. Кептіру үшін қосымша шығын кетеді. Сондықтан биыл Үкімет алғаш рет диқандарға арзан бағамен сұйытылған газды бөлді. СҚО-ға мың тонна берілді. Өйткені өңірдегі 59 астық қабылдау орны газбен жұмыс істейді. Бұдан бөлек осы мақсатқа 20 мың тонна арзандатылған дизель отыны берілді, қазір өтініштер қабылданып жатыр», — дейді Мейрам Меңдібаев. 

СҚО-да бүгінде 46 элеватор және 332 астық қабылдау орны бар. Олар 7 млн тоннаға жуық дәнді дақылды кептіре алады. 

Естеріңізге салайық, биыл СҚО 4,4 млн га дәнді-майлы дақылдарды екті. Қазір алқапта 7 мың техника егін орып жатыр.