Биылға мұнай өндіру жоспары 2 млн тоннаға қысқартылды – Энергетика министрлігі
АСТАНА. KAZINFORM – Каспий құбыр консорциумына жасалған шабуылдардың салдарынан елімізде мұнай өндіру көлемі 98 млн тоннадан 96 млн тоннаға дейін қысқартылды. Бұл туралы бүгін Үкімет отырысынан кейінгі брифингіде Энергетика министрі Ерлан Ақкенженов айтты.
- Қаңтарда, одан кейін маусым-шілде айларында жалғасқан шабуылдардың салдарынан шамамен 3,5 млн тонна мұнай жоғалттық. Осыдан кейін ТШО акционерлері күрделі жөндеу жұмыстарын жасамау туралы шешім қабылдады. Келесі жылға ауыстырылды, - деді министр.
Оның атап өтуінше, келесі жылы NCOC операторының кен орындарында да жөндеу жұмыстарын жүргізуге шешім қабылданған.
- Біз биыл 98 млн тонна мұнай өндіруді жоспарланған едік. Қазір жоспар 96 млн тоннаға түзетілді. КҚК-ға жасалған шабуылдан өндірілмеген мұнай көлемі 3,5 млн тоннаны құрайды, - деді Ерлан Ақкенженов.
Айта кетейік, соңғы рет 30 шілдеде Каспий құбыр консорциумы екі танкерге тағы шабуыл жасалғанын, осыдан кейін мұнай тиеу жұмыстары уақытша тоқтатылғанын хабарлаған еді.
