Білім күні Қосшыда жаңа екі мектеп есігін айқара ашты

ҚОСШЫ. ҚазАқпарат – 1 қыркүйек - Білім күні Ақмола облысының Қосшы қаласында 1500 орындық мектеп-гимназия мен 1200 орындық орта мектептің салтанатты ашылуы өтті, деп хабарлайды ҚазАқпарат тілшісі.

Ақмола облысы әкімдігінің баспасөз қызметінің мәліметінше, жаңа мектеп-гимназия Қосшы қаласының жаңадан салынып жатқан шағынауданында тұрғызылған.

Онда 2,5 мыңнан астам оқушы қазақ және орыс тілдерінде білім алады.

Білім ошағы «Болат Өтемұратов қорының» жеке инвестициясы есебінен салынып, Қосшы қаласының білім бөліміне беріліп отыр.

«Мектеп - мейірім мекені» алғашқы қоңырау салтанаттына Оқу-ағарту министрі Ғани Бейсембаев, Ақмола облысының әкімі Ермек Маржықпаев, «Верный Капитал» инвестициялық тобының бас директоры Ерлан Оспанов, «Болат Өтемұратов қоры» қамқоршылық кеңесінің төрағасы Алмаз Шарман, сондай-ақ, ұстаздар мен оқушылар және олардың ата-аналары қатысты.

Шарада құттықтау сөз сөйлеген аймақ басшысы педагогтар мен оқушыларды Білім күні және оқу жылының басталуымен құттықтады.

«Ақмола облысында, оның ішінде Қосшы қаласында үш ауысымды оқыту мәселесі өзекті болды. Бүгін біз екі жаңа мектепті ашу арқылы бұл мәселені толық шешіп отырмыз», - деп атап өтті облыс басшысы.

Салтанатты жиында «Верный Капитал» компаниялары инвестициялық тобының бас директоры Ерлан Оспанов та сөз алды.

«Біздің команда бұл мектепті озық технологияларды пайдалана отырып, заманауи талаптарға сай тұрғызып, жабдықтады. Мектепте балалардың сапалы дамуы үшін барлық жағдай жасалған. Сіздерді 1 қыркүйек - Білім күнімен құттықтаймын!»,- деді Ерлан Оспанов.

Содан кейін бас директорға мектеп әкімшілігінің кілті салтанатты түрде табысталды.

Қазіргі заманғы материалдық-техникалық базасы бар үш қабатты оқу орнында 56 оқу және 19 арнайы кабинет орналасқан.

Сондай-ақ, 2 спорт залы, кең асхана және медициналық кабинет бар.

Сонымен бірге, осы күні 1200 орындық тағы бір жаңа орта мектепте алғашқы қоңырау соғылды. Онда оқушылар мемлекеттік тілде білім алады.

Салтанатты шара барысында биыл алғаш рет мектеп табалдырығын атап отырған бірінші сынып оқушысының анасы Ардақ Зұлқажапқызы осы игі іске қол ұшын созған азаматтарға шынайы алғысын білдірді.

«Үш баламда осы жаңа мектепке барады. Бұрын орын болмағандықтан балаларымыз үш ауысымды оқытқан екінші мектепте білім алды. Енді бұл мәселенің түбегейлі шешілгеніне қуаныштымын. Жаңа мектеп өте жайлы, балаларымыздың алаңсыз білім алуына барлық жағдай жасалған», - деп қуанышымен бөлісті Ардақ Зұлқажапқызы.

Айта кетсек, биылғы жылы Ақмола облысының білім саласын дамытуға 220 миллиард теңге бөлінді.

Жаңа оқу жылында 4000 орындық 6 жаңа мектеп ашылды. Сонымен қатар, жыл соңына дейін 1800 орындық қосымша тағы 8 білім беру мекемесін ашу жоспарланған.

Еске сала кетейік, бұдан бұрын биыл Ақмола облысында 14,3 мың бала мектеп табалдырығын аттайтынын жазған едік.