«Білім туралы заңына өзгерістер мен толықтырулар енгізу туралы» заң жобасында кәсіптік-техникалық білім беруге ерекше көңіл бөлінетін болады - сенатор

қпанның 24-і. ҚазАқпарат /Айдар Оспаналиев/ - Жақында Сенат депутаттары Қазақстан Республикасының «Білім туралы заңына өзгерістер мен толықтырулар енгізу туралы» заң жобасын қарайды. Ондағы өзгерістер негізінен кәсіптік-техникалық білім беру саласының тиімділігін арттыруды көздейді. Бұл туралы бүгін осы мәселеге байланысты Астанадағы Политехникалық колледжде өткен көшпелі жиын барысында сенатор Ақан Бижанов мәлім етті,

деп хабарлайды ҚазАқпарат.

Оның айтуынша, бүгінде елдің индустриялық-инновациялық даму бағдарламасы мен «бизнестің жол картасы» шараларын жүзеге асыру және заман талабы еліміздің экономикасы үшін орта деңгейлі жоғары білікті кадрларды дайындауды қажет етіп отыр. Осыған қарай кәсіптік-техникалық білім беру қазір өте маңызды мәселеге айналуда. «Енді бізге осы кадрларды дайындау жұмыстарының тиімділігін арттыратын тетік дайындау қажет. Осы тұрғыдан алғанда бүгінгі отырыстың мән-маңызы ерекше деуге болады», деді А.Бижанов.

Көшпелі отырысқа Сенат депутаттары мен Білім және ғылым министрі Жансейіт Түймебаев, Астана қалалық әкімшілігі мен бірқатар мемлекеттік органдар өкілдері және жоғары оқу орындарының ұстаз-мамандары, ғалымдар қатысты. Олар елдегі кәсіптік-техникалық білім беру мәселесіне қатысты өзара пікір алмасып, құзырлы министрліктер мен ведомстволардың құнды, тың мәліметтерімен танысты.