Былтыр елімізде 714 мың адам тұрақты жұмыспен қамтылды

АСТАНА. KAZINFORM – Өткен жылы 1 миллионға жуық адам еңбекпен қамтылды. Бұл туралы Еңбек және халықты әлеуметтік қорғау вице-министрі Асқар Биахметов мәлім етті.

- 2024 жылдың қорытындысы бойынша Қазақстанда 979 мың азамат жұмыспен қамтылды, оның 714 мыңы тұрақты жұмысқа орналасты. Оның ішінде ұлттық жобалар мен салалық тұжырымдамалар аясында 65 мыңға жуық азамат жұмысқа орналастырылды. Мемлекет басшысының «10 мың тұрғынға шаққанда 100 жұмыс орны» бастамасы аясында 314 мыңнан астам адам, жұмыс берушілер ұсынумен 359 мың адам және тағы 241 мыңнан астам адам еңбекпен қамту шаралары аясында жұмыс тапты, – деді Асқар Биахметов орталық коммуникациялар қызметі алаңында өткен баспасөз мәслихатында. 

Вице-министрдің айтуынша, бүгінде ақпараттық жүйелері арқылы жұмысқа орналасқандардың міндетті зейнетақы жарнасының бар-жоғы, электрондық еңбек шарттарын жасау жағдайына мониторинг жүргізіледі. 

- Мониторинг нәтижесінде жұмысқа орналасқан азаматтардың 85% зейнетақы жарна түскені және шамамен 60% жұмысшымен электрондық еңбек шарты жасалғаны анықталды. Жалпы өткен жылы жұмыспен қамту шараларына 325 мың азамат тартылды, - дейді ол. 

Еске сала кетсек, былтыр Мәжіліс депутаты Асхат Аймағамбетов елімізде жұмыспен қамтуда «тізесі шыққан» шараларды қолданатынын айтқан еді. 

Сондай-ақ Еңбек министрлігі ауылда жұмыспен қамтудың жаңа формаларын енгізуі мүмкіндігін айтты.