Бірінші жартыжылдықта ЖІӨ 105,1 пайызды құрады - Үкімет басшысы

АСТАНА. 9 шілде. ҚазАқпарат - Бірінші жартыжылдықта еліміздегі жалпы ішкі өнім 105,1 пайызды құрады.

Бұл туралы бүгін Үкіметтің селекторлық отырысында ҚР Премьер-Министрі Серік Ахметов мәлім етті.

«Жарты жылдың қорытындысы бойынша, жалпы ішкі өнім 105,1 пайызды, өнеркәсіптің физикалық индексі 101,8 пайызды құрады»,-деді ол.

Үкімет басшысының атап өтуінше, негізгі капиталға салынған инвестиция да жаман жүргізіліп жатқан жоқ. Ол шамамен 8 пайызды құрап отыр.

«Қазақстан Республикасындағы жарты жылдықтағы инфляция 2,7 пайызды құрады. Бұл барынша төмен инфляция. Менің ойымша осындай қарқынмен жұмысты одан әрі жалғастыру қажет»,-деді С. Ахметов.

Дегенмен, Премьер-Министрдің сөзіне қарағанда, еліміздің күрделі секторлары ауыр жағдайларда қалып отыр. Олар - тау-кен және тау-кен өндіру салалары.