Биыл 10 өңірде жастарға арналған тұрғын үй бағдарламасы іске қосылады
АСТАНА. ҚазАқпарат – ҚР Ақпарат және қоғамдық даму министрі Дархан Қыдырәлі жастарды баспанамен қамту жұмыстары туралы баяндады, деп хабарлайды ҚазАқпарат.
«Жастардың тұрғын үй мәселесін шешу бойынша нақты жұмыстар жалғасады. Қазір өңірлік тұрғын үй бағдарламалары 6 өңірде іске қосылды. Биыл жыл соңына дейін осындай бағдарламаларды 10 өңірде әзірлеу жоспарланған», - деді Д. Қыдырәлі министрліктің кеңейтілген алқа отырысында.
Айта кетейік, таяуда мемлекеттік жастар саясаты туралы заң қабылданды. Заңға сәйкес, жастар санаты 35-ке дейін ұлғайды. Бұл санаттағы азаматтар саны 6 миллионға дейін көбейді.
Дарынды жастарды қолдау мақсатында 3 млн теңгеден «Тәуелсіздік ұрпақтары» гранты 33 адамға тағайындалды.
Бұл грант жыл сайын беріледі және оның көлемін ұлғайту жоспарланған.
Былтыр Қазақстан жаһандық жастардың даму индексінде 150 мемлекет арасынан 63-орыннан 53-орынға көтерілген.
