Биыл 100 млрд теңгеден астам қаржы игерілген жоқ - Бақыт Сұлтанов
«Мемлекеттік бюджеттің шығыстары 9 трлн 21 млрд теңгені құрады немесе есепті кезеңдегі жоспарға - 97,7 пайызға жетті. Ағымдағы жылдың 8 айында республикалық бюджеттің шығыстары 7 трлн 983 млрд теңгеге игерілді немесе 98,6 пайыз деңгейінде. Өткен жылмен салыстырғандағы игерудің жақсы қарқынына қарамастан, 1 қыркүйектегі жағдай бойынша 115 млрд теңгеге жуық қаржы игерілмеді. Оның ішінде 13,2 млрд теңге бюджет қаржысын үнемдеу, 101,6 млрд теңге қаржының игерілмеуінен болды»,-деді министр биылғы 8 айдағы бюджеттің атқарылуы бойынша баяндамасында.
Оның сөзіне қарағанда, жоспардың орындалмауына бюджеттік бағдарламалар әкімшілерінің баяу әрекет етуі негізгі себеп болды. 8 айдың қорытындысы бойынша 16,6 млрд теңге іске асырылмаған конкурстар мен олардың дер кезінде өткізілмеуі кесірінен игерілмей қалды. Ал 6,9 млрд теңге нормативтік-құқықтық актілердің уақтылы қабылданбауы салдарынан орындалмады.
Екіншіден, бюжеттің тиісті көлемде игерілмеуіне мердігерлер жұмысына бюджеттік бағдарламалар әкімшілері тарапынан жеткіліксіз деңгейдегі бақылау ықпал етті.