Биыл 11 мыңнан астам этникалық қазақ оралман мәртебесін алды
НҰР-СҰЛТАН. ҚазАқпарат – Биылғы жылдың 1 қарашасына дейін 11,8 мың адам тарихи Отанына оралып, оралман мәртебесін алды. ҚазАқпарат бұл туралы ҚР Еңбек және халықты әлеуметтік қорғау министрлігіне сілтеме жасап хабарлайды.
Жалпы, 1991 жылдан бері республикаға 1 миллион 69,1 мың этникалық қазақ оралған.
«Осы жылы Қазақстанға келген оралмандардың жартысынан көбі (55,5%) Қытайдан, 28,8% – Өзбекстаннан, 9,1% – Түрікменстаннан, 3,4% – Моңғолиядан және 2,9% — басқа елдерден келді.
Этникалық қазақтар негізінен Алматы (52,3%), Маңғыстау (13,4%) және Түркістан (5,5%) облыстарына, сондай-ақ Нұр-Сұлтан (4,1%) және Алматы қалаларына (5,7%) қоныстанды.
10 айдағы мәлімет бойынша, еңбекке қабілетті жастағы қоныс аударушылар саны 55,9%, еңбекке қабілетті жастан кішілер 32,6% және зейнеткерлер 10,5% құрайды», - делінген министрліктің баспасөз ақпаратында.
