Биыл да Ұлы Отан соғысы ардагерлеріне 30 мың теңге көлемінде біржолғы материалдық көмек берілетін болады
АЛМАТЫ. 4 мамыр. ҚазАқпарат /Нәзира Елеухан/ - Бүгін Алматы қалалық жұмыспен қамту және әлеуметтік бағдарламалар басқармасы мен бақылау және әлеуметтік қорғау департаменті Ұлы Отан соғысы ардагерлері мен еңбек ардагерлеріне құрмет көрсетті.
Арнайы шақырылған ардагерлерге сый-сыяпат көрсетіліп, концерт ұйымдастырылды. Аталмыш шараның ұйымдастырушылары оларды келе жатқан Ұлы Жеңіс мерекесімен құттықтап, жүрекжарды тілектерін білдірді. Шараға 80-нен аса Ұлы Отан соғысы ардагерлері мен еңбек ардагерлері қатысты.
Алматы қалалық жұмыспен қамту басқармасы өкілдерінің айтуынша, Алматыда 1913 соғысқа қатысушылар бар, ал 21 721-і еңбек майданының ардагерлері.
Ұлы Жеңіс мерекесі қарсаңында ардагерлерді ұлықтауға арналған мерекелік шаралар жоспарлануда және материалдық көмек көрсету де көзделген. Биыл Алматы қаласы мәслихатының шешіміне сәйкес (№ 423. 2011 жылдың 29 сәуірінен) Ұлы Отан соғысы ардагерлеріне 30 мың теңге көлемінде біржолғы материалдық көмек берілетін болады. Барлығы осы мақсатқа 57 390 000 теңге бөлінген.
