Биыл игерілмей жатқан 5 млн гектар жер мемлекетке қайтарылды

АСТАНА. ҚазАқпарат – Биыл игерілмей жатқан 5 млн гектар жер мемлекет меншігіне қайтарылды. Бұл туралы Ауыл шаруашылығы министрлігінің баспасөз қызметінен мәлім етті, деп хабарлайды ҚазАқпарат тілшісі.

«Бүгінгі таңда ағымдағы жылдың соңына дейін пайдаланылмайтын және заңнаманы бұза отырып берілген 5 млн гектар жерді қайтару жоспарлы мерзімінен бұрын орындалды.

Сондай-ақ, тиісті шаралар қабылданғаннан кейін, Ауыл шаруашылығы миннистрлігінің жер инспекторлары ағымдағы жылы жұмыс істеп тұрған субъектілердің 1,8 млн гектар ауыл шаруашылығы жерін игеруге кірісті», - делінген ведомство хабарламасында.

Министрлік дерегінше, келесі жылы игерусіз жатқан ауыл шаруашылығы мақсатындағы тағы 5 млн гектар жер мемлекетке қайтарылмақ. Бүгінде оларды қайтару бойынша жұмыстар қолға алынған.

Еске салайық, бұған дейін ҚР Парламенті Мәжілісінің депутаты Ерлан Саиров Қазақстанның ең шұрайлы жерлері игерілмей жатқанын мәлімдеп еді.