Биыл Кентауда кен өндіру кәсіпорны іске қосылады

Бұл бағыттағы жұмыстарға бүгінгі күнге инвесторлар 120 млн теңгенің қаржысын жұмсаған. Ол қаржы кепілде тұрған ғимаратты сатып алуға, құжаттамаларды реттеуге жұмсалған. Ендігі кезекте құны 3 млн АҚШ доллары болатын құрал-жабдықтар сатып алынып, кен өндіру кәсіпорны өз жұмысын бастамақ. Аталған кәсіпорын іске қосылған уақытта 200-ге жуық адам жұмыспен қамтылады деп жоспарлануда. Бұл туралы Кентау қаласының әкімі Әбдібақыт Мақұлбаев ауыл тұрғындары алдындағы есептік кездесуінде мәлім етті,  деп хабарлайды қала әкімінің баспасөз қызметі.

  Бүгінде жобалау сметалық құжаттамалары әзірленіп жатқанын айтқан «Ащысай тау-кен комбинаты» ЖШС директоры Нысанбай Кенжебаев ақпан, наурызда зауытты қайта тіркеу және заңдастыру жұмыстары жүргізілетінін жеткізді.

   «Табиғатты қорғау жайын стандарттарға сәйкестендіреміз. Бұл жұмыстардың барлығын атқару үшін уақыт керек. 25 жылға қабылданып отырған бағдарлама бойынша жоба жер қойнауындағы қазба байлықтарды игеру мақсатында жүзеге асады. Жоба бойынша 200-ге жуық адам жұмыспен қамтылады. Жыл соңында кәсіпорын өз жұмысын бастайды деп күтілуде», - деді Нысанбай Кенжебаев.

  Осы ретте қала басшысы жыл аяғына дейін жергілікті тұрғындарды арнайы бағдарламалар бойынша оқытып, мамандықтарын сәйкестендіру жұмыстарын жүзеге асыру қажеттігін атап өтті.

   Есептік кездесуде тұрғындардың сұрақтарына жан-жақты жауап берген Ә.Мақұлбаев сала мамандарына атқарылуы тиіс нақты тапсырмаларды жүктеп, алдағы міндеттерді нақтылады.