Биыл Жезқазған-Қызылорда автомагистралiн салуға 3 млрд. теңге бөлiнбек
АСТАНА. ҚазАқпарат - Жезқазған-Қызылорда тасжолын салуға 3 млрд. теңге бөлiнедi деп жоспарланды. Бұл туралы бүгiн Орталық коммуникациялар қызметiнде өткен баспасөз мәслихатында ҚР Инвестициялар және даму министрлiгi Автомобиль жолдары комитетiнiң төрағасы Мереке Пiшембаев мәлiм еттi.
Оның айтуынша, 2015 жылы стратегиялық маңызы бар «Қарағанды - Жезқазған - Қызылорда» автомагистралін салу бойынша жобаны жүзеге асыру көзделуде.
«Қызылорда - Жезқазған - Қарағанды - Павлодар бағыты бойынша 4 жоба бар. Екi жоба - Қызылорда облысы бойынша, 2 жоба - Қарағанды облысы бойынша. Жалпы ұзындығы 150 шақырым. Биыл ол жобаға 3 млрд. теңге жоспарлап отырмыз. Қыркүйек айында конкурсты жариялап, құрылысқа дайындық жұмыстарын бастаймыз», - дедi ол.
Айта кетейiк, «Қызылорда - Жезқазған» автожолының құны шамамен 10,1 млрд. теңгеге бағаланып отыр. Қазір жол-құрылыс компанияларын құру-әлеуетті мердігерлердің тендерге қатысуы үшін жұмыстар жүргізілуде.
