Биыл ЖІӨ-нің номиналды өсімі 120 пайызды құрайды - Е.Досаев
АСТАНА. ҚазАқпарат - Ағымдағы жылы жалпы ішкі өнімнің номиналды өсімі 120 пайызды құрайды. Бұл туралы ҚР Үкіметінің селекторлық режімдегі отырысында ҚР Экономика және бюджеттік жоспарлау министрі Ерболат Досаев мәлім етті.
Оның атап өтуінше, Экономика және бюджеттік жоспарлау министрлігі ағымдағы теңге бағамы өсуінің елдің негізгі макроэкономикалық көрсеткіштеріне, ЖІӨ-ге, бюджет кірістері мен шығыстарына, инфляцияға әсер ету ықпалына бағалау жүргізген.
«Экономика және бюджеттік жоспарлау министрлігінің бағалауы бойынша девальвацияның өзгеруін ескере отырып, ЖІӨ-нің номиналды көлемі қосымша 6,5 пайыздық тармаққа ұлғаяды және ЖІӨ-нің номиналды өсуі 2014 жылы 120 пайызды құрайды», - деді министр.
Е.Досаевтың атап өтуінше, жалпы ішкі өнімнің номиналды көлемі 2014 жылы бұрын болжамдалған 38,6 трлн. теңгемен салыстырғанда 41,1 трлн. теңгені құрайды.
