Биылғы қаңтар-маусымда қысқа мерзімді экономикалық индикаторының өсуі 104,1 пайызды құрады - ҚР Статистика агенттігі

АСТАНА. 11 шілде. ҚазАқпарат - Қысқа мерзімді экономикалық индикатор 2013 жылғы қаңтар-маусымда 2012 жылғы сәйкес кезеңге қарағанда 104,1 пайызды құрды. Бұл туралы бүгін Астанада өткен брифингте ҚР Статистика агенттігінің төрағасы Әлихан Смайылов мәлім етті.

2013 жылғы қаңтар-маусымда негізгі капиталға салынған инвестициялар көлемі 2281,4 млрд. теңгені құрады, бұл өткен жылғы осы кезеңге қарағанда 7,9 пайызға артық.

Аталған мерзімде өнеркәсіп өндірісінің көлемі қолданыстағы бағаларда 8737,5 млрд. теңгені құрады, бұл 2012 жылғы қаңтар-маусымға қарағанда 1,8 пайызға жоғары. Кен өндіру өнеркәсібінде және каръерлерді қазуда өндіріс көлемі 2,2 пайызға, өңдеу өнеркәсібінде 1,8 пайызға, электрмен жабдықтау, газ, бу беру, сондай-ақ ауа баптауда 0,5 пайызға өсті. Сумен жабдықтауда, кәріз жүйесі, қалдықтарды жинау және бөлуді бақылауда өндіріс 11,9 пайызға төмендеді.

2013 жылғы қаңтар-маусымда ауыл шаруашылығы жалпы өнімінің көлемі 510,3 млрд. теңгені құрады, нақты көріністе, 2012 жылғы қаңтар-маусымдағы деңгейден 1,4% артық.