Биылғы жылы ірі қара еті бағасының өсуі Алматы және Шығыс Қазақстан облыстарындағы жағдайға байланысты
Бұл туралы бүгін Үкімет отырысында Экономикалық даму және сауда министрі Жанар Айтжанова мәлім етті, деп хабарлайды ҚазАқпарат.
2010 жылдың қаңтар-сәуірінде ет және ет өнімдерінің бағасы 5,5 пайызға қымбаттаған. Оның ішінде ірі қара еті 8 пайызға жоғарылаған.
«Құс етінен басқа еттің барлық түрлерімен еліміз өзін-өзі қамтамасыз етіп отыр. Ірі қара етінің 30 пайызы Алматы және Шығыс Қазақстан облыстарында өндіріледі. Ал бұл өңірлерде қыстың қатты болуына, сондай-ақ төтенше жағдайларға байланысты мал шаруашылығына ықпал етті. Атап айтқанда бұл факторлар ірі қара етінің бағасының өсуіне әсер етті»,- деді министр.
Ж. Айтжанованың сөзіне қарағанда, елімізде құс етін ішкі тұтыну көлемінің 70 пайызы импортқа тәуелді. «Біз 30 пайызын өзіміз өндіреміз. Қалғанын негізінен АҚШ-тан тасымалдаймыз»,- деді министр.