Біз «Алтын белгі» иегерлері қауымдастығын құруға жан-жақты қолдау жасаймыз - ЕҰУ-дың ректоры

деп хабарлайды ҚазАқпарат.
«Алтын белгі» иегерлері қауымдастығы» қоғамдық бірлестігі жобасының авторы Ұлықбек Бегімовтың айтуынша, аталған ұйым аясында Еуразия ұлттық университетінде оқып жатқан барлық «Алтын белгі» иегерлерін біріктіріп, олардың білім-ғылым саласындағы әлеуеттерін барынша өсіру көзделген. «Қазіргі кезде бірлестіктің нақты жоспары да бар. Оның ішінде «Алтын белгі» иегерлерінің ғылыми жинағын шығару, «Интеллектуал - 2010» жарысын өткізу және осы жоғары мәртебеге ие болған қазақстандық жастардың арнайы веб-порталын ашу», - дейді Ұ.Бегімов.
Өз кезегінде университет ректоры Бақытжан Әбдірайым жастардың бұл ұсынысын толығымен қолдайтынын білдіріп: «Меніңше, бұл ұйымды заңды тұлғалар бірлестігі ретінде құру қажет. Еуразия ұлттық университеті өз тарапынан аталған бастамаға қажетті қаржылай көмек беруге даяр», - деді ол.
Айта кетейік, бүгінгі таңда Лев Гумилев атындағы Еуразия ұлттық университетінде Қазақстан бойынша ең көп «Алтын белгі» иегерлері білім алуда. Олардың саны - 1266 адам.