Бизнестегі әйелдердің үлесі қанша

АСТАНА. ҚазАқпарат - Қазақстан Республикасының Мемлекеттік хатшысы Гүлшара Әбдіхалықова Қазақстанда жүргізіліп жатқан гендерлік теңдік саясатының жұмысы туралы әңгімелеп берді, деп хабарлайды «ҚазАқпарат» ХАА тілшісі.

«Бұл мәселе біз үшін өте маңызды әрі ол әрдайым күн тәртібінде. Соңғы жылдары бірқатар тұжырымдамалық құжаттар қабылданды. Олардың ішінде 2006-2016 жылдарға арналған гендерлік теңдік стратегиясы бар. Бұл стратегия өз жұмысын аяқтап, 2030 жылға дейінгі жаңа гендерлік даму тұжырымдамасы қабылданды. ЕҚЫҰ-ның қолдауымен біз ерлер мен әйелдердің теңдігі, тұрмыстық зорлық-зомбылыққа қарсы іс-қимыл жөнінде екі заң қабылдадық. Бұл заңдар жұмыс істеп тұр. Уақыт талабына сай оларға өзгерістер енгізіледі», - деді ЕҚЫҰ өкілдерімен кездесуі кезінде Гүлшара Әбдіхалықова.

Оның айтуынша, бүгінгі таңда Қазақстан экономикасындағы әйелдердің үлесі (әсіресе шағын және орта бизнесте) 50% құрайды. Парламент Мәжілісінде бұл көрсеткіш 27%, мәслихаттарда 22%-тен 30% -ке дейін жеткен.

«Елде әйелдер қоғамдық және саяси өмірде, экономикада, әлеуметтік салаларда жұмыс істей алатындай жағдай жасалған» - деді Мемлекеттік хатшы.