БҚО-да автожол саласында 271 млн теңге негізсіз жұмсалған

ОРАЛ. KAZINFORM – Батыс Қазақстан облысында автомобиль жолдарын паспорттау жүргізілмеген.

ҚР Сыбайлас жемқорлыққа қарсы іс-қимыл агенттігі БҚО бойынша департаменті превенция басқармасының басшысы Біржан Хайруллиннің мәлім еткеніндей, соның салдарынан автомобиль жолдарын салу және жөндеу жұмыстары жүйесіз атқарылуда.

Біржан Марданұлының сөзіне қарағанда, мысалы, Орал қаласында Абай, Назарбаев даңғылдары мен Сарайшық көшесі соңғы жылдары бірнеше рет жөнделген. Ал Е.Тоқсанов, Т.Жароков және Преображенская көшелерінің жолдарына кейінгі 20 жылда бірде-бір жөндеу жасалмаған.

- 2019 жылдан бері жергілікті атқарушы органдардың тапсырысымен автомобиль жолдары бойынша 195 жобалық-сметалық құжаттама дайындалған. Алайда соның 68-і жүзеге аспай қалған, қазір бұларды қолдану мерзімдері өтіп кеткен. Яғни бюджеттің 271,2 млн теңгесі негізсіз жұмсалған, - дейді Б.Хайруллин.

Оның айтуынша, өңірде орташа жөндеуге арналған ЖСҚ бола тұра, күрделі жөндеуге жаңадан жобалық-сметалық құжаттама жасау деректері де тіркеліп отыр. Атап айтқанда, 2021 жылы Бөкей ордасы ауданында Мұратсай ауылына кіреберіс жолға орташа жөндеуге 1,8 млн теңгеге жобалық-сметалық құжаттама дайындалған. Кейін күрделі жөндеуге қайтадан құжаттама жасалды. Осыған ұқсас жағдай Казталов ауданы Беспішен-Қошанкөл-Қараоба жолын жөндеу барысында орын алды. Мұнда орташа жөндеу жобасын әзірлеуге 1,3 млн теңге бюджет қаржысы жұмсалған. Кейін күрделі жөндеуге қайтадан құжаттар дайындалған.

- Жасалған жобалық-сметалық құжаттамалардың дер кезінде жүзеге асырылмауының негізгі себебі – қала мен аудан әкімдіктерінің мәселені толық қадағаламауы деп есептейміз, - дейді Б.Хайруллин.

Еске сала кетейік, бұдан бұрын Оралда былтыр жөнделген жолдың опырылып қалуына байланысты әкімдік жауап бергенін жазған едік.