БҚО-да балаларды тамақтандыру бойынша 37 млн теңге тұратын 12 конкурстың күші жойылды

ОРАЛ. KAZINFORM — Жәнібек ауданының білім беру бөлімі биылғы 29 қаңтарда 1-4 сыныптарда оқитын 731 балаға тамақ ұйымдастыру бойынша 37 млн 608,176 мың теңгеге 12 конкурс жариялады. 

БҚО прокуратурасының баспасөз қызметінен мәлім еткеніндей, конкурстық құжаттаманы зерделеу барысында білім бөлімі әзірлеген перспективалық мәзірдің санитариялық-эпидемиологиялық талаптарға сәйкес келмейтіні анықталды.

Атап айтқанда, кейбір күндері балалардың күнделікті рационында болуы тиіс сүт, қант және май көрсетілмеген.

Сонымен қатар мәзірге 5 компоненттен тұратын күрделі салат енгізілген. Бұл Денсаулық сақтау министрінің «Қоғамдық тамақтану объектілеріне қойылатын санитариялық-эпидемиологиялық талаптар» санитарлық қағидаларын бекіту туралы бұйрығының талаптарын бұзу болып есептеледі.

Сондай-ақ тиісті 200 грамм шырынның орнына аталмыш мәзірде осы сусынның көлемі төмендетілген. Яғни 165 грамм болып кеткен.

— Жәнібек ауданы прокуратурасының наразылығы бойынша конкурстардың күші жойылды. Аудан прокуратурасы қадағалау қызметі аясында мемлекеттік сатып алу саласындағы заңнаманың сақталуын бақылауды жалғастыруда, - деп хабарлады ведомстводан.

Еске сала кетейік, бұдан бұрын БҚО-да субсидия беру кезінде мемлекетке 7 миллионға жуық теңге шығын келтірілгенін жазған болатынбыз.