БҚО-да індет жұқтырған жүкті әйел алыс ауданнан санавиациямен жеткізілді
ОРАЛ. ҚазАқпарат – Батыс Қазақстан облысында індет жұқтырған 39 жастағы жүкті келіншек Бөкей ордасы ауданынан санавиациямен жеткізілді, деп хабарлайды ҚазАқпарат тілшісі.
Облыстық жұқпалы аурулар ауруханасының директоры Надия Ахметованың айтуынша, әйел бесінші балаға жүкті, көтергеніне 19 апта болған.
«Қазіргі кезде әйелдің жағдайы орташа ауыр. Коронавирустан толықтай емделуде. Қызуы қалыпты. Оттегіге тәуелді емес, өздігінен дем алады. Бәрі жақсы болады деп үміттенеміз», деді Н.Ахметова.
Бөкей ордасы ауданы Орал қаласынан 600 шақырым қашықтықта жатыр.
Еске сала кетейік, бұдан бұрын БҚО-да желтоқсанда 50-ден астам баланың коронавирус жұқтырғанын жазған болатынбыз.
