БҚО-да қалдықтарын заңсыз орналастырған компаниядан 2 млрд-тан астам қаржы өндірілді

ОРАЛ. ҚазАқпарат - Табиғат қорғау прокуратурасының ықпал ету актісімен БҚО бойынша мемлекеттік кірістер департаменті бұрғылау қалдықтарын заңсыз орналастырғаны үшін «Орал Ойл энд Газ» ЖШС-дан облыс бюджетіне 2,07 млрд теңге салық төлемін өндірді.

БҚО прокуратурасының баспасөз қызметінен түскен мәліметке қарағанда, өнеркәсіп қалдықтарын жоятын кешеннің жоқтығына байланысты аталған серіктестік қауіпті бұрғылау қалдықтарын облыс аумағынан тыс жерге тасу үшін тасымалдаушы ұйымдармен келісім-шарт жасаған. Бұл аталған қалдықтардың рұқсат берілмеген жерлер: елді мекендер мен мемлекеттік қорықтар маңына, Орал қаласы мен Зеленов ауданының ауыл шаруашылығы жерлеріне бақылаусыз орналастырылуына «мүмкіндік берген».

ҚР Экологиялық кодексінің 283-бабына сәйкес жеке және заңды тұлғалар өздерінің қызметі нәтижесінде құралатын өндіріс және тұтыну қалдықтарының меншік иесі және соған жауапты болып табылады.