БҚО-да көлік апаты болып, 3 бала зардап шекті
ОРАЛ. ҚазАқпарат – Батыс Қазақстан облысында жеңіл автокөлік жүк көлігімен соқтығысып, төрт адам ауруханаға жеткізілді, деп хабарлайды ҚазАқпарат тілшісі.
БҚО төтенше жағдай департаментінің баспасөз қызметі мәлім еткеніндей, оқиға 12 қыркүйек күні сағат 21.00-де Орал-Атырау жолының 50-шақырымында Ақжайық ауданы аумағында болды.
«ВАЗ-2109» автокөлігі «MAN» жүк көлігімен соқтығысқан.
Оқиға орнына трассалық медициналық-құтқару бекетінің қызметкерлері барып, төрт адам құтқарылды. Олардың біреуі 34 жастағы әйел болса, қалғандары – 15, 10 және 8 жасар балалар.
Бәрі де Ақжайық аудандық орталық ауруханасына жеткізілді.
Қазіргі кезде оқиғаның жай-жапсары анықталу үстінде.
Еске сала кетейік, бұдан бұрын Оралда Ұлттық ұлан жауынгерінің жол апатына түскен жүргізушіні құтқарғанын жазған болатынбыз.
