БҚО-да коронавирус жұқтырған бес адам Теңіз кен орнынан келген

ОРАЛ. ҚазАқпарат – Батыс Қазақстанда коронавирус жұқтырған соңғы бес адам Атырау облысындағы Теңіз кен орнынан келген, деп хабарлайды ҚазАқпарат тілшісі.

БҚО әкімдігінен түскен мәліметке қарағанда, олардың бәрі де – өңір тұрғындары.

Барлығы індет жұқтырған науқастармен қарым-қатынаста болғандықтан, карантиндік стационарға жатқызылған.

ПТР диагностикалық зерттеу қорытындысымен COVID-19 диагнозы нақтыланып, бесеуі де облыстық жұқпалы аурулар ауруханасына орналастырылды.

Науқастармен қарым-қатынаста болғандар медициналық бақылауға алынды.

Ауру ошақтарында дезинфекциялық жұмыстар жүргізілді.

Осылайша БҚО-да ауырғандар саны 208-ге жетті.

Еске сала кетейік, бұдан бұрын БҚО әкімінің коронавируспен күресіп жатқан дәрігерлермен байланысқа шыққанын, соңғы анықталған 4 науқастың үшеуі шетелдіктер екендігін жазған болатынбыз.