БҚО-да күшті жел 120 шаршы метр қора шатырын жұлып әкетті

ОРАЛ. ҚазАқпарат - Батыс Қазақстан облысында күшті жел шаруашылық құрылысының шатырын жұлып әкетті, деп хабарлайды ҚазАқпарат тілшісі.

БҚО ТЖ департаментінің баспасөз қызметінен түскен мәліметке қарағанда, оқиға 20 маусым күні сағат 21.30-да Бөрлі ауданы Бумакөл ауылында болды.

«Екпіні секундына 23 метрге дейін жеткен қатты жел салдарынан ауыл шетінде орналасқан «Бижанов» шаруа қожалығына тиесілі қораның 120 шаршы метр шатырын сыпырылып түсті. Құрылыстың құжаты жоқ, жалпы ауданы - 300 шаршы метр. Қабырғасы саман тастан қаланған, төбесі профлиспен жабылған. Зардап шеккендер жоқ», деп хабарлады ведомстводан.

Кеше Орал қаласында да күшті жел тұрып, селдетіп нөсер жауып өтті.

Еске сала кетейік, бұдан бұрын Батыс Қазақстанда тұрмыстық техника тиелген жүк көлігі жанып кеткенін жазған болатынбыз.