БҚО-да күшті жел мектеп пен клубтың шатырын жұлып кетті
ОРАЛ. ҚазАқпарат - Батыс Қазақстан облысында күшті жел мектеп пен клубтың шатырын жұлып кетті, деп хабарлайды «ҚазАқпарат» тілшісі.
БҚО ТЖ департаментінің баспасөз қызметінен алынған мәліметке қарағанда, 5 ақпан күні сағат 09.08-де Зеленов ауданы Белес ауылында Мектеп көшесі, 15-мекенжайында орналасқан мектеп-балабақша кешені ғимаратының 120 шаршы метр шатыры құлағаны жөнінде хабар түскен. Ғимараттың жалпы ауданы - 3061 шаршы метр.
Сол секілді сағат 13.30-да Зеленов ауданы Новенький ауылында Пионер көшесі, 9-мекенжайында клубтың да 114 шаршы метрді құраған шатыры ұшып кеткен.
Екі оқиға бойынша да зардап шеккендер жоқ. Оқиға орнында арнайы комиссия жұмыс жасауда.
Айта кетейік, өңірде 4-5 ақпан күндері күшті жел тұрып, бұрқасын көтерілетіні жөнінде БҚО ТЖ департаменті ескерту жариялаған болатын.
